സ്വകാര്യ ബസുകൾക്ക് നിറ നിയന്ത്രണം: സിറ്റി ബസ് പച്ച, ഓർഡിനറി നീല
തിരുവനന്തപുരം∙ സ്വകാര്യ ബസുകൾക്ക് ഇനി തോന്നിയതു പോലെ പല നിറങ്ങൾ വാരിപ്പൂശിയും ഇഷ്ടതാരങ്ങളുടെ ചിത്രം പതിച്ചും സർവീസ് നടത്താനാകില്ല. സ്വകാര്യ ബസുകളുടെ നിറം ഏകീകരിക്കാൻ സംസ്ഥാന ഗതാഗത അതോറിറ്റി തീരുമാനിച്ചു.
സിറ്റി ബസുകൾക്കു പച്ചയും ഓർഡിനറി ബസുകൾക്കു നീലയും ലിമിറ്റഡ് സ്റ്റോപ് ഓർഡിനറി ബസുകൾക്കു മെറൂൺ നിറവുമാണു നിശ്ചയിച്ചത്. എല്ലാ ബസുകൾക്കും അടിവശത്തു വെള്ളനിറത്തിൽ മൂന്നു വരകൾ ഉണ്ടാകും. ഫെബ്രുവരി ഒന്നുമുതൽ റജിസ്റ്റർ ചെയ്യുന്ന ബസുകൾക്കും ഫിറ്റ്നസ് പരിശോധനയ്ക്കെത്തുന്ന ബസുകൾക്കും പുതിയ നിറം നിർബന്ധമാക്കി. ചട്ടപ്രകാരമുള്ള നിറങ്ങൾക്കു പുറമെ സ്റ്റിക്കറുകളോ മറ്റു ചിത്രങ്ങളോ അനുവദിക്കില്ല.