http://news.keralakaumudi.com/news.p...ffb2d3039092cc
ദുൽഖറിന് നായികമാർ മൂന്ന്
രഞ്ജിത്ത് ദുൽഖർ സൽമാനെ നായകനാക്കി സംവിധാനം ചെയ്യുന്ന ചിത്രത്തിൽ നായികമാർ മൂന്ന്. യൂത്ത് ഐക്കൺ ദുൽഖർ നായകനായെത്തുമ്പോൾ ചിത്രവും ന്യൂജനറേഷൻ ആയിരിക്കുമെന്ന് കരുതരുതേ. എഴുപതുകളിലെ കഥ പറയുന്ന ഒരു സീരിയസ് ചിത്രവുമായാണ് രഞ്ജിത്തിന്റെ വരവ്. ടി.പി. രാജീവന്റെ കെ. ടി.എൻ കോട്ടൂർ എഴുത്തും ജീവിതവും എന്ന കൃതിയെ ആധാരമാക്കി ഒരുക്കുന്ന ചിത്രം നിർമ്മിക്കുന്നത് ഗോൾഡ് കോയിൻ ഫിലിംസാണ്. ചിത്രത്തിന്റെ ഷൂട്ടിംഗ് മാർച്ച് ആദ്യവാരം ആരംഭിക്കും.
ആദ്യമായാണ് ദുൽഖർ രഞ്ജിത്തിന്റെ സിനിമയിൽ അഭിനയിക്കുന്നത്. ദുൽഖറിന്റെ ഈ വർഷത്തെ രണ്ടു സിനിമകളും സീനിയർ സംവിധായകർക്കൊപ്പമാണ്. ലാൽജോസിന്റെ വിക്രമാദിത്യനാണ് മറ്റൊരു ചിത്രം, അഞ്ജലി മേനോൻ സംവിധാനം ചെയ്യുന്ന ബാഗ്ളൂർ ഡേയ്സിലാണ് ദുൽഖർ ഇപ്പോൾ അഭിനയിക്കുന്നത്. ഫഹദ് ഫാസിൽ, നിവിൻ പോളി, നിത്യാ മേനോൻ, നസ്രിയ, ഇഷാ തൽവാർ, പാർവതി മേനോൻ എന്നിവരും ഈ ചിത്രത്തിലുണ്ട്. സംവിധായകരായ അൻവർ റഷീദും അമൽ നീരദും ചേർന്നാണ് നിർമ്മാണം.
മോഹൻലാലിനെ നായകനാക്കി ജി ഫോർ ഗോൾഡ് എന്ന ചിത്രം സംവിധാനം ചെയ്യാനിരിക്കുകയായിരുന്നു രഞ്ജിത്ത്. ഒരു സമ്പൂർണ മോഹൻലാൽ ചിത്രമാവും രഞ്ജിത്ത് സംവിധാനം ചെയ്യുക എന്നായിരുന്നു വാർത്ത. നടൻ സിദ്ദിഖിനെയാണ് വില്ലനായി തീരുമാനിച്ചിരുന്നത്. എന്നാൽ ജനുവരിയിൽ ഷൂട്ടിംഗ് തുടങ്ങാനിരിക്കെ ചിത്രം ഉപേക്ഷിക്കുകയായിരുന്നു. ഒടുവിൽ വിവാദങ്ങൾക്ക് വിട നൽകി പുതിയ ചിത്രത്തിന്റെ പണിപ്പുരയിലേക്ക് കടന്നിരിക്കുകയാണ് രഞ്ജിത്ത്. ഒപ്പം കാമറാമാൻ വേണു സംവിധാനം ചെയ്യുന്ന സിനിമ നിർമ്മിക്കുന്നതും രഞ്ജിത്താണ്.