സി.പി.എമ്മിന്റെ കൊലക്കത്തിയുടെ മുള്മുനയിലാണെങ്കിലും കേരളീയ മനസ്സാക്ഷിയെ പിടിച്ചുലച്ച അമ്പത്തിയൊന്ന് വെട്ടുകള്ക്ക് പിന്നിലെ യാഥാര്ത്ഥ്യങ്ങള് അഭ്രപാളികളിലെത്തിക്കുക തന്നെ ചെയ്യുമെന്ന് സംവിധായകന് മൊയ്തു താഴത്ത്.'ടി.പി-51' എന്ന സിനിമയുടെ ചിത്രീകരണം 31ന് ആരംഭിക്കുന്നതോടെ തന്നെയും ടി.പിയെ അവതരിപ്പിക്കുന്ന പ്രധാന നടന് രമേശനെയും ഇല്ലാതാക്കുമെന്നും ഭയപ്പെടുന്നു. തീരാന് വേണ്ടി വിധിക്കപ്പെട്ടതാണ് തന്റെ ജീവിതമെന്ന ഉറച്ച വിശ്വാസത്തോടെയാണ് സിനിമയുമായി മുന്നോട്ടുപോവുന്നത്.എന്തൊക്കെ ഭീഷണിയും പ്രലോഭനവുമുണ്ടായാലും സംരംഭവുമായി മുന്നോട്ടു പോവും. ടി.പി ചന്ദ്രശേഖരനായി വേഷമിടാന് പല പ്രമുഖ നടന്മാരെയും സമീപിച്ചെങ്കിലും ആരും തയ്യാറായില്ല. അവര്ക്കൊന്നും നട്ടെല്ലില്ലെന്നതാണ് യാഥാര്ത്ഥ്യം. നടീ നടന്മാര് ഭീഷണിമൂലം പിന്മാറിയതാണ് ചിത്രീകരണം ഏറെ വൈകിയത്. സമ്മതം മൂളിയ പലരും പിന്നീട് സുരക്ഷാ ഭീഷണിയും മറ്റും പറഞ്ഞ് ഒഴിഞ്ഞു മാറുകയായിരുന്നു.എല്ലാ പ്രതിബന്ധങ്ങളും മറികടന്നാണ് ചിത്രീകരണത്തിനുള്ള ഒരുക്കങ്ങള് പൂര്ത്തിയായത്. നായക കഥാപാത്രത്തെ അവതരിപ്പിക്കുന്ന രമേശ് വടകരക്ക് ഒട്ടേറെ തവണ വധഭീഷണിയുണ്ടായിട്ടുണ്ട്. അദ്ദേഹത്തിനും കുടുംബത്തിനും സുരക്ഷയൊരുക്കണമെന്ന് ആവശ്യപ്പെട്ട് ഇന്ന് കണ്ണൂരില് ആഭ്യന്തരമന്ത്രി രമേശ് ചെന്നിത്തലക്ക് നിവേദനം നല്കും.